பெண் மன வானில்.....

பெண் மனதை வெளிப்படுத்தும் அல்லது பெண் பாடகர்கள் பாடிய பாடல்கள் பற்றிய இத்தொடருக்கு அழைத்த நண்பர் ராஜாவிற்கு நன்றியும் வணக்கங்களும்!

பெண் மனம் ஆழமானது ஒரு வானம்போல பரந்தது அதில் பல்வேறு உணர்வுகள் இருந்தாலும் பல சமயங்களில் அவற்றை ஆண்கள் போல வெளிப்படுத்த முடிவதில்லை. திரைப்படங்களில் பெண்கள் மட்டும் பாடல்கள், பெண் மனதை வெளிப்படுத்தும் பாடல்கள் பல வந்திருந்தாலும் அவற்றில் பெரும்பாலனவை காதல் சார்ந்தவையாக வந்துள்ளன. தாய்ப்பாசம் கூட ஆண் பாடுவது போலதான் பல பாடல்கள் உள்ளன. உண்மையில் மற்ற உணர்வுகளை வெளிப்படுத்தும் பாடல்கள் திரைப்படங்கள் அதிகமாக இல்லை என்பதே உண்மை.

பொதுவாக எனக்கு மெலடி பாடல்களே அதிகமாக பிடிக்கும். அவற்றை கேட்கையில் மனம் லேசாகிவிடுகிறது. எனக்கு பிடித்த பெண் மனதை வெளிப்படுத்தும் அல்லது பெண் பாடகர்கள் பாடிய பாடல்கள் ஏராளமாக உள்ளன. எல்லாவற்றையும் எழுத முடியாததால் அவற்றில் சிலவற்றை மட்டும் சொல்கிறேன். எல்லாப் பாடல்களை கேட்கவும் லிங்க் தந்துள்ளேன். கிளிக் செய்து கேட்கலாம்.

1. ஸ்ரேயா கோஷல் அவர்கள் பாடி ஜூலி கணபதி படத்தில் இடம்பெற்ற எனக்கு பிடித்த பாடல் என்ற பாடல். இப்பாடலில் ஏதோ ஒரு புரியாத உணர்வு ஏற்படும். ஸ்ரேயா அவர்களின் குரல் மிக இனிமையாக இருக்கும்.

2. எங்கே என் புன்னகை (தாளம்). இப்பாடலை ஷோபா என்பவர் பாடியுள்ளார் (எஸ்பிபி அவர்களின் குரலும் சிறிது வரும்). ஒரு பெண்ணின் காதல் ஏக்கம் இதில் தெரியும். பலருக்கு இந்த பாடலும், இசையும் மிகவும் பிடிக்கும்.

3. என்னுள்ளே என்னுள்ளே (வள்ளி) : ஸ்வர்ணலதா அவர்களின் பெரும்பாலான பாடல்கள் இனிமையாகவே இருக்கும். இது மிக உருக்கும் குரலான் ஆன பாடல். ஒரு பெண்ணின் உணர்ச்சிகளை வெளிப்படுத்தும் பாடல்.

4. சித்ரா அவர்கள் பாடிய பல பாடல்கள் சிறப்பாக இருக்கும். அதில் இந்த இரண்டு பாடல்கள் சிந்து பைரவி படத்தில் இடம்பெற்றவை முதல் படம், முதல் பாடல் போல் தெரியாமல் அற்புதமாக பாடியிருப்பார்.
ஒரு மகள் பெற்றோர் அன்புக்காக ஏங்கும் பாடல் - நானொரு சிந்து
இது சித்ரா அவர்களின் முதல் பாடல்- பாடறியேன் படிப்பறியேன்

5. ஜானகி அவர்களின் குரல் மிகவும் பிடிக்கும் அவர்களின் பாடல்கள் பல எனக்கு பிடிக்கும் அதில் சில:
சாதனை படத்தில் இடம்பெற்ற அன்பே அன்பே, அத்தி மர பூவிது ஆகிய இரண்டு பாடல்கள்.
தாய் பாடும் பாடல் - பிள்ளை நிலா (நீங்கள் கேட்டவை)
காதல், ஆசை கலந்த ஒரு பெண்ணின் பாடல் - பொன்வானம் பன்னீர் தூவுது (நேற்று நீ நாளை நான்)
சின்ன சின்ன (மௌன ராகம்)
காற்றில் எந்தன் (ஜானி)

6 ஜென்சி அவர்கள் ஒரு கால கட்டத்தில் அவரின் பாடல்கள் மிக பிரபலம். அதில் ஜானி படத்தில் வரும் இப்பாடல் என் வானிலே - வெறுமை நிறைந்த ஒரு பெண்ணின் வாழ்க்கை

7. ஏண்டி முத்தம்மா (ஆறு புஷ்பங்கள்)- இது ஒரு ஆண் பாடும் பாடல் ஆனால் பெண்ணின் வெட்கத்தை சொல்லும் பாடல். இசையமைத்து பாடியவர் சந்திரபோஸ் அவர்கள்.

8. சில பழைய பாடல்கள்:
* கண்ணும் கண்ணும் (வஞ்சி கோட்டை வாலிபன்) - பெண்கள் போட்டியிடுவது போல பல பாடல்கள் திரைப்படங்களில் வந்தாலும் இப்பாடல் அவற்றிற்கு முன்னோடி. கேட்பதை விட பார்க்க நன்றாக இருக்கும். இப்பாடலை பாடியவர்கள் ஜிக்கி, பி.லீலா
* நாளை இந்த வேளை பார்த்து ஓடிவா நிலா (உயர்ந்த மனிதன்) - இந்த பாடல் பி. சுசீலா அவர்களால் பாடப்பட்ட இப்பாடலுக்காக அவருக்கு தேசிய விருது கிடைத்ததாம். மிக அருமையான பாடல். அவரின் மற்றுமொரு பாடல் மயங்கினேன் (நானே ராஜா நானே மந்திரி)
* காதோடுதான் நான் பாடுவேன் (வெள்ளி விழா) - எல்.ஆர். ஈஸ்வரி அவர்களின் கணீர் குரல் அற்புதமானது. இதில் மென்மையாக பாடுவார். மிக இனிமையான பாடல்.
* பூவாகி காயாகி (அன்னை) - பானுமதி அவர்கள் பாடிய தாய்ப் பாசம் உணர்த்தும் பாடல்
* பழம் நீயப்பா (திருவிளையாடல்)-  இந்த கணீர் குரலும் கம்பீரமும் எந்த பெண் பாடகிக்கும் இருந்ததில்லை. அதுதான் இவரின் சிறப்பு நடிப்பு பாடல் என சிறப்பாக செய்திருப்பார் கே.பி. சுந்தராம்பாள்.

9. கடவுள் தந்த (மாயாவி): இந்த பாட்டு இந்த லிஸ்டில் சேருமா என தெரியவில்லை. ஆனால் கல்பனா என்ற பாடகி இந்த பாடலை சிறப்பாக பாடியிருப்பார். அவர் குரல் மிக நன்றாக இருந்தது, கூடவே எஸ்பிபி சரணும்.

10. ஆறும் அது ஆழமில்ல (முதல் வசந்தம்) - இளையராஜா அவர்கள் பாடிய பாடல்.


இது போல பல பாடல்கள் உள்ளன. எனக்கு இப்போதைக்கு நினைவில் இருக்கும் பாடல்களை தந்துள்ளேன். இந்த தொடர்பதிவை விருப்பமுள்ளவர்கள் யாரும் தொடரலாம்!